Kavi apni kavita ko dhoondte dhoonte apni kalpana ke paas ka pahucha.
Kavi apne Kalpana se : “Aee Kalpana mujhe meri pehli kavita
se miloo”
Kalpana: “Kya tumhe us kavita ki koi kalpna hai?”
Kavi: “Nahin”.
Kalpana: “Kaise likhoge us kavita ko?”
Kavi: “Pata nahin, tum kuch batto”
Kalpana: “Chodo ye kavito ko, tumse ye sab nahin hoga”
Kavi: “Meri zindagi meri kavita ke bina adhoori hai”
Kalpana: “Zindagi toh hai tumhare pass,kalpana ke paas zindagi nahin hai”
Kavi: “Tum kya jaano kalpana , Kavita ke kya mayne hote hain
ek kavi ke liye.
Mujhe meri kavita se milaoo. Kahan dhoondo main ussee?”
Kalpana: “Apne Ehsaaso main”
Kavi: “Ye Ehsaas kya hote hain?”
Kalpana: “Ehsaas tumhe nahin pata, aur kavita ko dhoond rahe
ho kavi sahab”
Kavi: “Apne Ehsaas ko tum apne pass rakho meri kalpana,
mujhe meri kavita ke labjz do”
Kalpana: “Aee meri nausikhya kavi, jis kavita main ehsaas
nahin uss kavita main koi jeevan nahin, Kavita main Ehsaas ke wahi mayne hai jo zindagi main rooh ke
hai, labjzoo se nahin,
ehsaaso se kavita banti hai ”
Kavi: “Ye ehsaas kahan milenge ?”
Kalpana: “Zindagi main”
Kavi: “Kab milenge?”
Kalpana: “Sahi Samaya pe”
Kavi: “Kalpana, kaise
pata chalega ki yahi sahi kavita hai?”
Kalpana: “Kavita tumhe batlayegi , ki wahi sahi kavita hai,
aur tum nahin wo tumhe dhoondte aayegi jab uska samay aayega”
Kavi: “Uska samay kab aayega ?”
Kalpana: “Ab aur kuch na poocho humse, tumhari kalpana hona
bahut mushkil kaam hai mere liye. Ab hum tumse tabhi milenge jab tumhare paas
tumhari kavita hogi, main ja rahi hoon.""
Kavi ab akela apni kavita ko dhoon raha hai
Kavi ki kalpana ussse rooth ke chale gayi. Ab kavi ke paas
uski kalpana bhi nahin thi. Thi uske paas uski zindagi jisse use apni kavita ko
dhoondni thi.
Kavi, parsehaan ghoomta raha dhoondta raha, logo se poochta
raha kab milegi uski kavita ussse ,
Thak kar Kuch samay baad kavi apni kavita ko bhool gaya, aur
yun hi apne jeevan main mashgool ho gaya. Wo kavi tha hi nahin , kaisa koi apne
aap ko kavi bata sakta hai jab uske paas uski kavita hi nahin!
Tab zindagi ne yun hi achaanak ek karvat lii. Aur uss naushikye kavi ko uske kavita se aakhir mila hi diya.
Kavi ko pata nahin ki wo kya kare, kya bole apni kavita se,
ab kavi ka nahin bolne ka samay kavita ka tha. Bahut
Intezaar kar liya tha use kavi ne.
Kavita ke milne ke baad usse kavi ko zindagi jeene ke mayane
samjh main aarahe the, Aaj tak wo duniya main keval mauzood tha par ab wo jee
raaha hai, jee raha hai apni kavi wali zindagi apni kavita ke saath.
Kavi ne phir se kalpana ko pukara
Kavi: “Aee kalpana , tum kahan ho, nahin miloge meri kavita
se”
Kalpana: “Kaise hi tumhari kavita?”
Kavi: “Meri kavita ko labjz main nahin piroyaa ja sakte ,
mere paas shabd nahin hai uski vyakhya karne ke liye, Inko keval mehsoos kiya ja
sakta hai kalpana”
Kalpana: “Aee kavi, jo kavi apne kavita ko labzoon main
bayaan nahin kar sakta vo kaisa kavi, kaun bolega usko kavi?”
Tabhi Kavi ke Hriday se kuch shabd phooot kar bahar aate
hain…
"Ehsaaso ko kavita main na badal saka toh
kya,
Ehsaaso ka har lamha mehsoos kiya hai maine,
Mujhe koi gham nahin ki duniya mujhe kavi
nahin bolegi
Mujhe toh khusi hai zindagi ko mehsoos kiya
hai maine".
-Abhishek Singh
